Sindikata e Bashkuar e Arsimit, Shkencës dhe Kulturës ka reaguar pas ligjëratës së mbajtur në Gjimnazin “Xhevdet Doda” në Prishtinë nga përfaqësues të Gjykatës Speciale dhe organizatës Nisma e të Rinjve për të Drejtat e Njeriut në Kosovë (YIHR).
Në reagim, SBASHK shpreh shqetësimin e thellë dhe kundërshtimin e fuqishëm ndaj aktivitetit, duke e cilësuar të papranueshme përdorimin e institucioneve arsimore për promovimin e një narrative të njëanshme, që synon të bindë nxënësit se Gjykata Speciale përfaqëson drejtësi.
“Nuk ka padrejtësi më të madhe sesa fakti që për më shumë se pesë vite mbahen në paraburgim luftëtarët e lirisë, bashkëpunëtorë të NATO-s, të cilët luftuan për të drejtat elementare të popullit të Kosovës – për lirinë, dinjitetin dhe të drejtën për arsimim… Prandaj, është paradoksale, e padrejtë dhe moralisht e papranueshme që sot, në po ato ambiente shkollore, të promovohet një gjykatë që po gjykon njëanshëm luftën çlirimtare të popullit të Kosovës, duke e barazuar viktimën me agresorin”, thuhet në reagim.
SBASHK kritikon edhe pjesëmarrjen e YIHR-it, duke theksuar se organizata ka kontribuar në futjen e një agjende politike dhe ideologjike në shkollë, pa respektuar ndjeshmërinë historike dhe kombëtare. Sindikata i bën thirrje Ministrisë së Arsimit, Drejtorisë Komunale të Arsimit në Prishtinë dhe menaxhmentit të Gjimnazit të marrin masa konkrete për të mos lejuar aktivitete të tilla.
“SBASHK apelon te të gjithë punëtorët e arsimit në Kosovë që të tregojnë vigjilencë dhe përgjegjësi profesionale e kombëtare, duke mos lejuar organizimin e aktiviteteve të tilla në institucionet tona arsimore… Liria e Kosovës nuk është krim. Lufta për arsim, liri dhe dinjitet nuk gjykohet”, theksohet në reagim.
Ndërkaq, Dhomat e Specializuara të Kosovës (KSC) kanë konfirmuar për Telegrafin se zhvillojnë aktivitete informuese në Kosovë që nga viti 2018, si pjesë e Programit të Shtrirjes së Informacionit, duke përfshirë nxënës, komunitetin lokal, gazetarë dhe avokatë. Zëdhënësja Angela Griep tha se takimet diskutojnë mbi mandatin dhe procedurat e gjykatës, duke ofruar informacion publik të ngjashëm me atë që gjendet në faqen zyrtare të KSC-së.
