Lidhja Demokratike e Kosovës ka mbajtur një konferencë për media, ku ka denoncuar rikthimin e reduktimeve të energjisë elektrike si pasojë e menaxhimit, sipas tyre të dobët dhe skandaloz të sektorit energjetik në vend.
Visar Azemi nga LDK theksoi se Qeveria aktuale nuk ka investuar asnjë euro në shtimin e kapaciteteve të reja energjetike, ndërkohë që ka shpenzuar mbi 1 miliard euro për import të energjisë elektrike.
“Për të ardhur në këtë situatë absurde, ka vetëm dy shpjegime të mundshme: ose kemi të bëjmë me paaftësi dhe keqmenaxhim të plotë në qeverisje, ose kemi të bëjmë me kapje të sektorit energjetik dhe hajnisë të organizuar nga mafia energjetike, ku përfshihen Martin Berishaj e Vuk Hamoviqi. Të shpenzohen 1 miliard euro nga paratë e qytetarëve për import të energjisë, dhe të mos investohet asnjë euro në kapacitete të reja prodhuese që do t’i shërbenin gjeneratave të ardhshme, është veprim i dëmshëm dhe i papërgjegjshëm ndaj së ardhmes së Kosovës”, tha Azemi.
Ai gjithashtu kritikoi Vetëvendosjen për emërime partiake në institucionet energjetike, duke përmendur rastin e nipit të deputetit Ejup Maqedonci, i cili u emërua në një pozicion drejtuese në KOSTT.
“Ata që dikur thoshin se familjarët i kanë ‘vetëm për dasma’, sot pothuajse në çdo emërim që bëjnë po i shndërrojnë institucionet në strehë për emërime partiake dhe familjare. Emërimi i nipit të deputetit të Vetëvendosjes në KOSTT-it tregon qartë kapjen e institucioneve energjetike në vend. Ky që sot është emëruar drejtor është gjithashtu bashkëpronar i një kompanie private të energjisë”, shtoi ai.
Azemi bëri thirrje që institucionet e drejtësisë të nisin menjëherë hetime për keqmenaxhimin në sektorin energjetik. Ai njoftoi gjithashtu se me konstituimin e Kuvendit të Kosovës, LDK do të kërkojë hetim parlamentar, auditim të pavarur dhe të plotë të shitblerjeve të energjisë, si dhe departizimin e institucioneve energjetike.
