Një grup banorësh serbë nga fshati Prilluzhë në Kosovë, kanë protestuar mëngjesin e së hënës para të së ashtuquajturës Zyrë për Kosovën në Serbi, për të kërkuar drejtësi lidhur me, siç kanë thënë, mënyrën e parregullt të punësimit përmes konkurseve në sektorin e shëndetësisë.
Sipas tyre, edhe në konkursin e fundit, përparësi u është dhënë personave me rikualifikim, në krahasim me kandidatët që janë arsimuar në mënyrë të rregullt. Ata theksojnë se, po ashtu, as këtë herë nuk është marrë parasysh gjendja sociale, përkatësisht “karta sociale”, gjatë vlerësimit të aplikantëve.
Banorët kërkuan rishqyrtim të procedurave të punësimit dhe transparencë në përzgjedhjen e kandidatëve, duke thënë se do të vazhdojnë të kërkojnë zgjidhje institucionale për këtë çështje.
“Nga Prilluzha, mëngjesin e sotëm, kanë mbërritur para Zyrës për Kosovë në Beograd, për të kërkuar drejtësi për shkak të mënyrës jo të rregullt të punësimit në konkurset për punë në sektorin e shëndetësisë , ku edhe kësaj here përparësi u është dhënë personave me rikualifikim, në krahasim me ata që janë arsimuar në mënyrë të rregullt, ndërsa po ashtu as këtë herë nuk është marrë parasysh gjendja (karta) sociale”, thuhet në mbishkrimin e publikuar në rrjetin social Facebook të së ashtuquajturës Zyrë për Kosovën në Serbi.
Kujtojmë se Serbia ka hapur jashtëligjshëm konkurse në Kosovë në institucionet paralale, gjatë kohës së fushatës zgjedhore, vitin e kaluar.
Ajo është kritikuar për ndërhyrje tek serbët në Kosovë, për çka ekspertë të çështjeve të sigurisë patën thënë se Serbia po përpiqet të ndikojë tek qytetarët serbë për të ndihmuar Listën Serbe.
