Profesori universitar Nexhmedin Spahiu i ka cilësuar si “vjedhje industriale” dyshimet për manipulimin e votave brenda partive politike në Kosovë.
Në emisionin “Info Nata” në Tëvë1, Spahiu ka thënë se procesi i rinumërimit të plotë të votave do ta nxjerrë në pah, sipas tij, “maskarallëkun” që ka ndodhur gjatë numërimit.
Ai theksoi se Prokuroria duhet të vendosë kritere të qarta për të dalluar gabimet e rastësishme nga manipulimet e qëllimshme.
Sipas Spahiut, një numër i vogël gabimesh mund të konsiderohet i paqëllimshëm, por kur bëhet fjalë për qindra apo mijëra vota, atëherë kemi të bëjmë me vjedhje të organizuar.
“Kur flasim për qindra apo mijëra vota, është natyrisht vjedhje industriale. Duhet të ketë masa edhe ndaj kandidatëve, sepse kjo nuk mund të ndodhë në mënyrë të paorganizuar. Askush nuk rrezikon pesë vjet burg vetëm për simpati ndaj një deputeti”, ka deklaruar Spahiu.
Ai shtoi se rinumërimi i votave është i domosdoshëm dhe se Prokuroria duhet të veprojë pa vonesë, në mënyrë që të mbrohet integriteti i procesit zgjedhor.
“Është mirë që kjo çështje të zbardhet njëherë e përgjithmonë, që të shërohet kjo plagë dhe të kemi zgjedhje me integritet”, ka përfunduar Spahiu.
Ndryshe, Komisioni Qendror i Zgjedhjeve ka vendosur që të ketë rinumërim të plotë të të gjitha votave në vendvotimet në 28 komuna.
Po ashtu është vendosur që të shkarkohet përfaqësuesit politikë në Komisionin Komunal Zgjedhor në Prizren, ku sipas kreut të KQZ-së, Kreshnik Radoniqi, janë vërejtur dallimet më të mëdha në votat për kandidatët për deputetë.
Paraprakisht, në këto 28 komuna KQZ kishte vendosur që të rinumëroheshin vetëm 10 për qind e vendvotimeve, ndërkaq në 10 komuna të tjera vendosi për rinumërim të plotë.
Vendimi i 19 janarit vjen pasi gjatë rinumërimit të pjesshëm u vërejtën dallime të mëdha në votat për kandidatët për deputetë në zgjedhjet e parakohshme parlamentare të 28 dhjetorit të vitit 2025.
