Policia e Kosovës ka njoftuar se në aksionin e zhvilluar në koordinim me Prokurorinë Themelore Prishtinë dhe me urdhër të Gjykatës Themelore Prishtinë, ka zhvilluar kontrolle në katër lokacione të ndryshme, duke përfshirë dy shtëpi/banesa private, një lokal afarist dhe një zyrë.
Sipas PK-së katër persona nga ta tre meshkuj kosovarë dhe një femër kosovare, dyshohet se janë përfshirë në veprat penale si: ’keqpërdorim i pozitës apo autoritetit zyrtar’’ dhe “marrja e ryshfetit në sektorin privat”.
Sipas komunikatës së PK-së të dyshuarit kanë marrë ryshfet për lëshimin e certifikatave për leje të armës ku personave që u është lëshuar leja nuk kanë qenë të pranishëm.
“Lidhur me rastin dyshohet se katër persona të dyshuar (nga ta tre meshkuj kosovarë dhe një femër kosovare) janë përfshirë në veprat penale të lartcekura, duke marrë ryshfet nga persona të ndryshëm të cilët janë pajisur me certifikatë për leje të armës pa prezencën e tyre, siç e parasheh ligji dhe procedurat tjera vijuese”, thuhet në komunikatën e PK-së.
Të dyshuarit janë dërguar në mbajtje për 48 orë.
Gjatë kontrollit janë sekuestruar përkohësisht: 7 telefona celularë, dosje dhe dokumente relevante në lidhje me rastin.
