Kandidati për deputet nga Lidhja Demokratike e Kosovës (LDK) në zgjedhjet e 28 dhjetorit, Driton Selmanaj, ka ngritur akuza të rënda për manipulim të votave, duke e cilësuar situatën aktuale si “manipulim industrial”, në vazhdën e asaj që ai e quan “vjedhje industriale të votave” në vitin 2010.
Përmes një postimi në Facebook, Selmanaj ka rikujtuar se menjëherë pas zgjedhjeve parlamentare të 9 shkurtit 2025 kishte shprehur dyshime serioze për manipulim votash në Qendrat Komunale të Numërimit në të gjithë Kosovën, si dhe në votat e diasporës dhe ato me postë.
Sipas tij, kërkesat për rinumërim të përgjithshëm të votave ishin injoruar plotësisht nga institucionet dhe subjektet politike.
Ai thekson se mungesa e reagimit institucional dhe vullnetit politik ka krijuar terren që e njëjta situatë të përsëritet edhe në zgjedhjet e 28 dhjetorit 2025.
“Çka po vërtetohet në komunën e Prizrenit nuk është rast i izoluar, por një dukuri që ka ndodhur në gjithë Kosovën”, ka shkruar Selmanaj, duke shtuar se rinumërimi i të gjitha kutive ka qenë dhe mbetet i domosdoshëm.
Sipas tij, rinumërimi në Prizren ka zbuluar të dhëna shqetësuese, ku votat u janë ndryshuar apo prekur kandidatëve të të gjitha partive politike, pa përjashtim, disa me dallime të mëdha e disa më të vogla.
Selmanaj ka shprehur dyshime se bëhet fjalë për një skenar të mirëorganizuar të abuzimit masiv të votave, i cili, sipas tij, ka përfshirë të gjithë kandidatët dhe partitë politike, me qëllim të balancimit dhe shpërndarjes së manipulimit për të shmangur identifikimin e problemit.
Ai ka theksuar se as lista e kandidatëve të LDK-së nuk i ka shpëtuar këtij skenari, përfshirë edhe veten e tij, ndërsa është distancuar qartë nga çdo individ që ka tjetërsuar vullnetin e qytetarëve të Prizrenit.
Selmanaj ka kërkuar nga Komisioni Qendror i Zgjedhjeve, Prokuroria dhe institucionet tjera kompetente që të ndërmarrin të gjitha veprimet e nevojshme për të rikthyer rregullsinë e procesit zgjedhor dhe për të ndëshkuar përgjegjësit.
