Kryeministri në detyrë, Albin Kurti, ka përkujtuar sot 558-vjetorin e vdekjes së Gjergj Kastriotit – Skënderbeut, duke e cilësuar atë si personalitetin më të rëndësishëm në historinë e shqiptarëve.
Në një postim në Facebook, Kurti ka rikujtuar se Skënderbeu vdiq më 17 janar 1468 në Lezhë, pas më shumë se dy dekadash në krye të rezistencës kundër Perandorisë Osmane.
Ai theksoi rolin e Skënderbeut si strateg ushtarak dhe prijës politik i njohur në Evropë, si dhe rëndësinë e bashkimit të fisnikëve shqiptarë në Kuvendin e Lezhës.
Sipas Kurtit, figura e Skënderbeut mbetet një shtyllë e identitetit kombëtar dhe vazhdon të shërbejë si burim frymëzimi dhe bashkimi për shqiptarët kudo që jetojnë.
Postimi u mbyll me mesazhin: “Lavdi ndër kohëra Gjergj Kastriotit – Skënderbeut, heroit kombëtar të shqiptarëve”.
