Ministri në detyrë i Mbrojtjes i Republikës së Kosovës, Ejup Maqedonci, është nderuar me përfshirje në Sallën e Famës (Hall of Fame) të Kolegjit të Komandës dhe Shtabit të Përgjithshëm të Ushtrisë së Shteteve të Bashkuara të Amerikës (U.S. Army Command and General Staff College).
Lajmi është bërë i ditur nga vetë Maqedonci përmes një postimi në Facebook, ku ka njoftuar se ceremonia solemne është mbajtur në Fort Leavenworth. Me këtë rast, është zbuluar portreti i tij fotografik, i cili do të vendoset në galerinë e personaliteteve të shquara të këtij institucioni, si dhe i është dorëzuar certifikata e nderit për arritje të jashtëzakonshme.
“Jam shumë i nderuar për përfshirjen në Sallën e Famës të Kolegjit të Komandës dhe Shtabit të Përgjithshëm të Ushtrisë së SHBA-së. Ky është një nderim jo vetëm personal, por edhe për popullin dhe shtetin e Kosovës”, ka shkruar Maqedonci.
Ai ka theksuar se këtë mirënjohje ua kushton bashkëluftëtarëve të Ushtrisë Çlirimtare të Kosovës, pjesëtarëve të Trupave Mbrojtëse të Kosovës dhe Forcës së Sigurisë së Kosovës, si dhe institucioneve dhe qytetarëve të vendit.
“Këtë mirënjohje ua përkushtoj bashkëluftëtarëve të UÇK-së, shokëve me të cilët kam shërbyer në TMK, të gjithë oficerëve dhe pjesëtarëve të FSK-së, Qeverisë së Republikës së Kosovës dhe popullit të atdheut tim”, ka theksuar ai.
Maqedonci ka rikujtuar se vetëm tre muaj më parë, më 14 tetor 2025, portreti i tij ishte vendosur edhe në Sallën e Famës të Kolegjit të Luftës së Ushtrisë së Shteteve të Bashkuara të Amerikës (U.S. Army War College) në Pensilvani.
“Duke qenë ushtaraku i parë nga Kosova që është nderuar në këto dy kolegje prestigjioze amerikane, ndihem thellësisht krenar për mundësinë që kam pasur ndër vite t’i shërbej vendit tim”, ka shkruar Maqedonci.
Në fund të mesazhit të tij, ministri në detyrë i Mbrojtjes ka theksuar se do të vazhdojë shërbimin me përkushtim, përgjegjësi dhe besnikëri ndaj detyrës, misionit dhe atdheut.
