Kryetari i Kuvendit të Kosovës në detyrë, Dimal Basha, ka bërë homazhe në varrezat e Reçakut, në kuadër të përkujtimit të 27-vjetorit të Masakrës së Reçakut.
Në një deklaratë për media, Basha tha se homazhet u zhvilluan së bashku me Presidenten Vjosa Osmani dhe Kryeministrin Albin Kurti, për të nderuar viktimat dhe për të kujtuar një nga krimet më të rënda të kryera ndaj popullit shqiptar.
“Së bashku me Presidenten Osmani dhe Kryeministrin Albin Kurti jemi këtu për të bërë homazhe dhe për të kujtuar martirët e Reçakut. Mediat botërore në këtë vend patën pasqyruar njëkohësisht edhe fytyrën barbare me tendenca gjenocidale të Serbisë ndaj një populli të pafajshëm shqiptar”, u shpreh Basha.
Ai theksoi se Masakra e Reçakut mbetet një plagë e hapur për shkak të mungesës së drejtësisë.
“Kjo masakër mbetet plagë e hapur sepse ende nuk ka drejtësi. Bashkësia ndërkombëtare ka bërë një punë të mirë me ndërhyrjen e saj, por jo edhe me sjelljen e autorëve para drejtësisë. Ne, si institucione, nuk do të ndalemi së kërkuari drejtësi, sepse padrejtësia ndaj viktimave të Reçakut dhe ndaj gjithë Kosovës nuk mund të harrohet. Vetëm drejtësia sjell paqe dhe siguri të qëndrueshme. Lavdi martirëve dhe dëshmorëve”, ka thënë Basha.
