SHBA-të dhe Mbretëria e Bashkuar po zvogëlojnë numrin e personelit të tyre në bazën ajrore Al-Udeid në Katar, në një kohë kur Presidenti i SHBA-së, Donald Trump, po shqyrton mundësinë e ndërmarrjes së veprimeve kundër Iranit për shkak të shtypjes së protestave antiqeveritare.
Zyrtarë amerikanë kanë thënë për CBS se tërheqja e pjesshme e personelit amerikan përbën një “masë paraprake”.
BBC kupton se edhe disa pjesëtarë të personelit ushtarak britanik po largohen nga baza.
Qeveria e Katarit, në një deklaratë zyrtare, tha se masat që raportohet se po ndërmerren nga SHBA-ja ishin “në përgjigje të tensioneve aktuale rajonale”.
Presidenti Trump ka deklaruar më herët se SHBA-të do të ndërmarrin “masa shumë të forta” kundër Iranit nëse autoritetet iraniane ekzekutojnë protestuesit.
Nga ana e saj, Irani ka paralajmëruar se do të hakmerret nëse sulmohet nga SHBA-ja dhe se bazat amerikane në Lindje të Mesme do të konsiderohen “targete legjitime”.
Duke komentuar largimin e personelit ushtarak, qeveria e Katarit tha se do të vazhdojë të “zbatojë të gjitha masat e nevojshme për të mbrojtur sigurinë e qytetarëve dhe banorëve të saj si një përparësi kryesore, duke përfshirë veprimet që lidhen me mbrojtjen e infrastrukturës kritike dhe objekteve ushtarake”.
Baza ajrore Al-Udeid është instalimi më i madh ushtarak amerikan në Lindjen e Mesme, ku janë të vendosur rreth 10,000 personel amerikanë, si dhe rreth 100 staf britanik. Nuk është bërë e ditur se sa prej tyre do të largohen.
Një zëdhënës i Ministrisë së Mbrojtjes së Mbretërisë së Bashkuar refuzoi të komentojë raportet se personeli britanik po tërhiqej “për shkak të sigurisë operacionale”.
