Bashkimi Evropian ka paralajmëruar platformën X të Elon Musk që të ndërhyjë menjëherë për të “rregulluar” mjetin e saj të inteligjencës artificiale, të cilin e cilëson si “të tmerrshëm”, pasi u lejon përdoruesve të krijojnë imazhe që “zhveshin” gra dhe fëmijë.
Në të kundërt, kompania rrezikon të përballet me masa urgjente nga autoritetet evropiane.
Paralajmërimi vjen pasi Komisioni Evropian ka zgjatur deri në fund të vitit 2026 një urdhër ruajtjeje të dërguar vitin e kaluar ndaj X-it, duke kërkuar mbajtjen e të gjitha dokumenteve dhe të dhënave të brendshme që lidhen me Grok.
Vendimi merret mes reagimeve globale ndaj imazheve “të zhveshura” të gjeneruara nga ky mjet.
“ X tani duhet të rregullojë mjetin e saj të inteligjencës artificiale në BE, dhe duhet ta bëjë këtë shpejt. Nëse jo, ne nuk do të hezitojmë ta përdorim plotësisht DSA-në për të mbrojtur qytetarët e BE-së”, tha komisionerja e teknologjisë e BE-së, Henna Virkunnen.
“Ofrimi i X për përdorimin e Grok për të krijuar dhe ndarë fotografi të grave dhe fëmijëve të zhveshur është i tmerrshëm ”, shtoi ajo në një postim në X.
Ndërkohë, qeveri dhe rregullatorë nga Evropa deri në Azi po ndërmarrin masa të ashpra kundër përmbajtjes seksualisht eksplicite të gjeneruar nga chatbot-i Grok i xAI, përfshirë hetime, ndalime dhe kërkesa për masa mbrojtëse, në kuadër të një përpjekjeje globale në rritje për të frenuar materialet e paligjshme.
