Ministri i Jashtëm i Iranit, Abbas Araghchi ka deklaruar se disa ide janë diskutuar me Uashingtonin dhe aktualisht po studiohen nga Teherani, duke sinjalizuar se kanalet e komunikimit mes dy vendeve mbeten të hapura pavarësisht tensioneve në rritje.
“Disa ide janë diskutuar me Uashingtonin dhe aktualisht po studiohen nga ne”, tha ministri i jashtëm iranian për Al Jazeera.
Duke folur për përgjegjësinë e përshkallëzimit të situatës, Araghchi tha se ka aktorë që po përpiqen të shtyjnë SHBA-në drejt një konflikti të drejtpërdrejtë.
Ai deklaroi se ka “nga ata që përpiqen ta fusin Uashingtonin në luftë për t’i shërbyer interesave të Izraelit”.
Sipas raportimeve komunikimi mes SHBA-së dhe Iranit po vazhdon në prapaskenë, ndërsa Presidenti amerikan Donald Trump ka vazhduar të lëshojë kërcënime ushtarake ndaj Iranit për atë që ai e përshkruan si mënyrën e trajtimit të protestave të fundit në vend.
Trump, ka konfirmuar se po shqyrton disa opsione ushtarake për të goditur Iranin, si përgjigje ndaj mënyrës se si autoritetet iraniane kanë trajtuar protestat.
Araghchi ka heksuar se qasja e Uashingtonit është e papranueshme për Teheranin. “Idetë dhe kërcënimet e propozuara të Uashingtonit kundër vendit tonë janë të papranueshme”, tha Araghchi.
Ai përsëriti gjithashtu deklaratat e mëparshme të autoriteteve iraniane, duke pretenduar se trazirat nuk kanë qenë thjesht protesta paqësore.
Sipas tij, “elementë të trajnuar terroristë u infiltruan në turmat e protestuesve dhe shënjestruan forcat e sigurisë dhe demonstruesit”.
