Ish-nënkryetari i Lidhjes Demokratike të Kosovës dhe anëtar i kësaj partie, Agim Veliu, ka reaguar pas rezultatit të zgjedhjeve parlamentare të 28 dhjetorit, duke e cilësuar atë si një humbje të rëndë që, sipas tij, nuk mund të relativizohet apo të kalohet në heshtje.
Në një reagim publik, Veliu ka thënë se rezultati i zgjedhjeve është një sinjal i qartë nga qytetarët dhe kërkon reflektim të thellë si dhe përgjegjësi politike brenda partisë.
“Rezultati i zgjedhjeve të 28 dhjetorit për LDK-në është një mesazh i qartë që nuk duhet anashkaluar. Humbjet e rënda nuk mund të relativizohen dhe as të kalohen me heshtje”, ka shkruar ai.
Veliu ka theksuar se në demokraci përgjegjësia është parakusht për ndërtimin e besimit, ndërsa dorëheqja, sipas tij, nuk është shenjë dobësie, por akt pjekurie dhe force politike.
Ai ka bërë thirrje për ndryshime të thella brenda LDK-së, duke kërkuar analizë të menjëhershme të shkaqeve të humbjes, hapje të partisë dhe funksionim të demokracisë së brendshme, si dhe nisjen e një procesi të ri zgjedhor në të gjitha nivelet.
“LDK sot nuk ka nevojë për justifikime, por për vendime të guximshme dhe ndryshim real. Vetëm përmes këtyre proceseve mund të rikthehet besimi i anëtarësisë dhe elektoratit”, ka theksuar Veliu.
Në fund, ai ka shtuar se koha kërkon vendime të forta dhe largim nga ruajtja e status quo-së, duke theksuar se LDK-së i nevojiten fitues dhe jo kandidatë të përhershëm.
