Uji ka mbushur rrugën në segmentin e rrugës nacionale Prishtinë – Ferizaj.
Veturat përpiqen të kalojnë pjesët më të thella të përmbytjes, duke e bërë kalimin të rrezikshëm.
Kësisoj, Ministria e Infrastrukturës mori vendim të shtunën që kjo rrugë të mbyllet për qarkullim.
Lajmin e dhanë Policia e Kosovës në një njoftim në Facebook.
“Shkaku i pranisë së madhe të ujit në rrugë, në një segment të rrugës nacionale Ferizaj – Prishtinë, ndalohet përkohësisht qarkullimi i automjeteve, për shkak të sasisë së madhe të ujit. Qarkullimi i automjeteve do të devijohet dhe orientohet përmes autostradës. Ky veprim është ndërmarrë si masë e domosdoshme për mbrojtjen dhe sigurinë e qytetarëve dhe parandalimin e rrezikut në trafik”, thuhet nga Policia e Kosovës.
Gjatë ditës, ministri në detyrë i Infrastrukturës, Hysen Durmishi bëri të ditur se në autostradën “Ibrahim Rugova” është regjistruar rrëshqitje e dheut, ndërsa autoritetet kanë nisur punimet për sanimin sa më të shpejtë, me qëllim rikthimin e qarkullimit normal.
Durmishi ka njoftuar se po ashtu te nënkalimi në Mazgit, në drejtim të autostradës, ka grumbullim të ujit si pasojë e bllokimit të kanalit atmosferik, ku gjithashtu po punohet në zhbllokimin e rrugës.
“Në Sllatinë, në rrugën Fushë Kosovë – Gjurgjicë, gjithashtu ka grumbullim të ujit në rrugë. Ekipet tona janë duke ndërhyrë në sanimin emergjent dhe shumë shpejt pritet rikthimi i qarkullimit normal. Në rrugën Zhur–Dragash kemi lëvizje të trupit të rrugës. Është vendosur sinjalizimi përkatës dhe aktualisht qarkullimi zhvillohet në një shirit”.
E nga reshjet e dendura të shiut nuk shpëtuan lehtë komunat në gjithë vendin.
Edhe në Gjilan, u krijua vështirësi për qarkullim.
Kështu, Komuna u kërkoi qytetarëve që përkohësisht të shmangin qarkullimin në rrugën për Kufcë në Malishevë, në rrugën ndërmjet dy Livoqëve, si dhe në magjistralen Gjilan–Ferizaj, në zonën e udhëkryqit të rrugës së Cërnicës.
Kronikë e realizuar nga gazetarja Jona Kelmendi.
