Kryetari i Aleancës për Ardhmërinë e Kosovës (AAK), Ramush Haradinaj, ka reaguar pas përmbytjeve të fundit që kanë prekur disa komuna të vendit, duke kërkuar ndërhyrje të menjëhershme nga institucionet qendrore dhe lokale.
Përmes një reagimi publik, Haradinaj ka theksuar se dëmet e shkaktuara janë të mëdha dhe kanë goditur drejtpërdrejt familjet, bizneset dhe ekonomitë familjare, duke vlerësuar se situata kërkon veprim të shpejtë dhe të koordinuar.
Ai ka bërë thirrje për vlerësim urgjent të dëmeve dhe për ofrim të mbështetjes direkte financiare për qytetarët e prekur, duke insistuar që fondet emergjente të ndahen pa asnjë vonesë.
Sipas tij, edhe buxheti i vitit 2026 duhet të rishikohet dhe të reflektojë qartë pasojat e kësaj fatkeqësie natyrore.
Haradinaj ka kërkuar që institucionet të rrisin nivelin e gatishmërisë dhe të jenë të pranishme në terren, duke theksuar se ndihma shtetërore duhet të ndihet menjëherë dhe të vazhdojë gjatë gjithë vitit të ardhshëm.
Në reagimin e tij, ai ka shprehur gjithashtu përkrahje të plotë për zjarrfikësit, Policinë e Kosovës dhe shtabet emergjente, të cilët po angazhohen drejtpërdrejt në menaxhimin e situatës dhe në ndihmë të qytetarëve.
