Gjykata Themelore në Prizren ka dhënë një reagim lidhur me pretendimet e avokatëve mbrojtës të të arrestuarve në rastin e Byronës Kosovare të Sigurimeve (BKS), sipas të cilëve ata po mbahen jashtëligjshëm në paraburgim.
Përmes një njoftimi, Gjykata theksoi se veprimet e saj janë kryer plotësisht në përputhje me dispozitat ligjore në fuqi.
Në njoftim sqarohen procedurat e ndjekura pas seancës dëgjimore për caktimin e masës së sigurisë ndaj 39 të pandehurve. Gjyqtari i procedurës paraprake ka vlerësuar se të dyshuarit do të qëndrojnë në qendrat e ndalimit deri në vendimin përfundimtar të gjykatës lidhur me kërkesën e Prokurorisë Themelore në Prizren.
Gjykata theksoi se seanca dëgjimore është mbajtur brenda afatit ligjor prej 48 orësh nga arrestimi, siç parashikohet në nenin 162, paragrafi 8 të Kodit të Procedurës Penale. Ky nen lejon mbajtjen nën ndalim të të pandehurit në pritje të një vendimi gjyqësor.
Sipas Gjykatës, ky proces është zbatuar korrekt dhe ligjërisht në këtë rast.
“Vendimi i gjyqtarit të procedurës paraprake është marrë në përputhje me dispozitat ligjore dhe është evidentuar në procesverbal në përfundim të seancës,” thuhet në njoftimin e Gjykatës.
Gjykata ka njoftuar gjithashtu se pas përpilimit të vendimit të plotë, ky i fundit do të publikohet dhe do t’u dërgohet palëve të përfshira në procedurë përmes dorëzimit fizik dhe elektronik. Mediat dhe publiku do të njoftohen zyrtarisht për vendimin në ditët në vijim./teve1.info/
