Për shkak të reshjeve të shumta gjatë orëve të fundit, Komuna e Malishevës ka njoftuar se disa segmente rrugore janë duke u përballur me vështirësi në qarkullim.
Komuna ka bërë të ditur se situata e përgjithshme mbetet e menaxhueshme dhe ekipet e Shërbimit të Zjarrfikësve dhe Shpëtimit, Policia e Kosovës, si dhe ekipet komunale janë në gatishmëri të plotë për sigurinë e qytetarëve.
“Lumi Mirusha ka dalë nga shtrati për shkak të prurjeve të mëdha, duke shkaktuar vështirësi në disa rrugë, përfshirë rrugën “Hamdi Berisha” në Malishevë, rrugën për në lagjen Hoti, si dhe disa akse të tjera si: rruga Malishevë-Banjë, rruga Mirushë-Gurbardh, rruga Lubizhdë-Turjakë, dhe disa ura në fshatra të caktuara, ku prezenca e ujit e ka bërë kalimin të vështirë”, thuhet në njoftimin e Komunës.
Ndërkohë, komuna ka thënë se furnizimi me energjinë elektrike është duke u realizuar me reduktime në disa zona të qytetit.
Ndërsa, furnizimi me ujë sipas kësaj komune është i rregullt, por s’është i përdorshëm për konsum për shkak të ndotjes nga vërshimet e ditëve të kaluara.
“Furnizimi me energji elektrike është duke u realizuar me reduktime në disa zona të qytetit, ndërsa furnizimi me ujë është i rregullt, megjithatë, uji aktualisht nuk është i përdorshëm për konsum për shkak të ndotjes nga vërshimet e ditëve të kaluara. Ekipet përkatëse janë duke punuar intensivisht për sanimin e këtyre problemeve. Komuna e Malishevës ka apeluar për qytetarët që të shmangin lëvizjen në rrugët e përmendura dhe të përdorin rrugë alternative për të siguruar qarkullimin e sigurt. Po ashtu, ata janë ftuar të respektojnë sinjalistikën e vendosur nga Policia e Kosovës për ndalim të qarkullimit dhe të tregojnë kujdes gjatë lëvizjes”, ka njoftuar tutje komuna./teve1.info/
