Zëvendëspresidenti i SHBA-së, J.D Vance ka thënë se, nëse Evropa nuk i trajton seriozisht shqetësimet e sigurisë së SHBA-së për Grenlandën, Uashingtoni “do të duhet të bëjë diçka për këtë”.
Vance u tha gazetarëve se kundërshtarët e SHBA-së “kanë treguar shumë interes” në territorin danez, megjithëse nuk dha hollësi.
SHBA-ja tashmë kanë një bazë ushtarake dhe sisteme mbrojtëse nga raketat në Grenlandë, dhe Danimarka është një aleat i Uashingtonit në NATO.
“Mendoj se këshilla ime për udhëheqësit evropianë dhe këdo tjetër do të ishte që ta merrnin seriozisht presidentin e Shteteve të Bashkuara”, tha Vance.
Presidenti Trump, në një intervistë të dhënë së fundmi për gazetën Neë York Times tha se, ndërsa administrata e tij po shqyrton “një gamë opsionesh” në përpjekjet për të fituar kontrollin e Grenlandës, theks të veçantë vendosi tek rëndësia e pronësisë.
“Pronësia është shumë e rëndësishme”, tha Trump, duke shtuar: “Sepse kjo është ajo që mendoj se është psikologjikisht e nevojshme për sukses. Mendoj se pronësia të jep diçka të cilën nuk mund të bësh, kur flet për një kontratë qiraje ose një traktat. Pronësia të jep gjëra dhe elementë që nuk mund t’i marrësh thjesht duke nënshkruar një dokument.”
