Në orët e mbrëmjes, Presidentja e Kosovës, Vjosa Osmani, vizitoi Komunën e Malishevës, ku u prit nga Kryetari i Komunës, Ekrem Kastrati. Qëllimi i vizitës ishte informimi i drejtpërdrejtë mbi gjendjen e krijuar nga reshjet e fundit dhe sfidat me të cilat po përballet komuna.
Kryetari Kastrati e falënderoi Presidenten për vizitën dhe e informoi për situatën aktuale, masat e ndërmarra për menaxhimin e situatës, si dhe rreziqet potenciale, duke përfshirë monitorimin e digës së Liqenit të Mirushës për të parandaluar çdo avari. Ai theksoi koordinimin e vazhdueshëm me Agjencinë për Menaxhimin e Emergjencave dhe Forcën e Sigurisë së Kosovës, si dhe ndihmën që komuna ka ofruar për qytetarët e prekur.
Kryetari Kastrati kërkoi gjithashtu mbështetje nga niveli qendror për sanimin e dëmeve, rindërtimin e infrastrukturës së dëmtuar dhe kompensimin e të dëmtuarve, duke përfshirë digën dhe disa ura.
Presidentja Osmani përgëzoi Komunën e Malishevës dhe të gjitha ekipet emergjente për menaxhimin e situatës, duke shprehur solidarizimin e plotë me qytetarët dhe institucionet lokale, dhe theksoi se, pavarësisht situatës së vështirë, nuk ka pasur humbje jete, duke vënë prioritet mbrojtjen e jetës së qytetarëve. Ajo theksoi se bashkë mund të punojnë në menaxhimin dhe parandalimin e situatave të tilla, sidomos tani që problemet janë identifikuar, duke ofruar mbështetjen e plotë të Presidencës.
Pas takimit, Osmani dhe Kryetari Kastrati vizituan digën e Liqenit të Mirushës për t’u njohur nga afër me gjendjen dhe rrezikun eventual që mund të paraqesë ajo.
