Instituti Hidrometeorologjik i Kosovës (IHMK) ka njoftuar për ndryshime të lehta në nivelet e ujit në disa lumenj të vendit, si pasojë e reshjeve të ditëve të fundit dhe kushteve aktuale atmosferike.
Sipas të dhënave të IHMK-së, disa lumenj që i përkasin pellgut të Drinit të Bardhë aktualisht po shënojnë rënie të lehta të niveleve të ujit, ndërsa disa të tjerë janë në ngritje të lehtë. Megjithatë, Drini i Bardhë në rrjedhën e tij të poshtme ndodhet në kuotat maksimale, kryesisht për shkak të reshjeve të fundit dhe kullimit të sistemeve ujore përreth.
Në pjesën qendrore të Kosovës, lumenjtë Ibër dhe Sitnicë, së bashku me degët e tyre, po shënojnë rënie të lehta të niveleve të ujit. Përjashtim bën lumi Llap, i cili sipas matjeve aktuale është në ngritje.
IHMK bën të ditur gjithashtu se të gjitha rrjedhat lumore të pellgut të Moravës së Binçës po shënojnë ngritje të lehta të niveleve të ujit, ndërsa situatë e ngjashme paraqitet edhe në pellgun e Lepencit.
Sipas Institutit, këto ngritje dhe lëkundje të niveleve të ujit janë të ndërlidhura drejtpërdrejt me kushtet atmosferike, përkatësisht me sasinë, intensitetin dhe intervalet e reshjeve që bien herë pas here në zona të ndryshme të vendit.
