Parkingu nëntokësor në qendër të Malishevës mbeti jashtë funksionit gjatë ditës së martë.
Kjo pasi reshjet e pandërprera të shiut bënë që kjo hapësirë të mbushet me ujë.
Por gjendja në këtë qytet mbetet e rënduar edhe në disa fshatra të saj, pasi uji depërtoi edhe nëpër shtëpi banimi.
Autore: Adea Mustafaj
Kjo ka bërë që disa familje edhe të evakuohen nga shtëpitë e tyre.
Gjendja në Malishevë mbetet e rënduar si pasojë e reshjeve të dendura të shiut. Disa familje, shtëpitë e të cilëve janë përmbytur nga uji, janë evokuar nga zjarrfikësit dhe janë larguar përkohësisht nga banesa e tyre.
Detaje rreth gjithë situatës dha shefi i sektorit për Emergjenca në Komunën e Malishevës, Halit Mazreku.
“Sa i përket ekipeve emergjente, ato janë në gjendje të ngritur të gatishmërisë dhe gjatë kësaj kohe ka pas intevenime të shumta, gjithnjë në evakuim, gjë që ka qenë primare në këtë situatë, do të thotë shpëtimi i jetëve të njerëzve duke evakuuar gjashtë familje, rreth 14 banorë dhe strehimin nga organet tjera” , tha Mazreku.
E nga komuna treguan për dëmet e shkaktuara.
“Gjendja realisht është e rënduar për shkak të reshjeve të mëdha edhe si pasojë e reshjeve lugu Mirusha dhe pjesë të tjera në territorin e Malishevës kanë dal nga shtrati dhe kanë shkaktu probleme sidomos në rrugë ku një pjesë e madhe e rrugëve janë të bllokuara ose janë me vështirësi të kalueshme, përjashtim rruga Prishtinë – Malishevë e cila qarkullon pa problem, rrugë të tjera kanë probleme. Poashtu kemi pasur probleme edhe në depërtimin e ujit nëpër shtëpi banimi dhe në biznese të tjera që kanë shkaktu dëme të konsiderueshme” , shprehet Izet Shala.
Shkak i situatës së krijuar nga vërshimet, Drejtoria e Arsimit në Komunën e Malishevës ka marrë vendim që procesi mësimor të mos fillojë deri më 12 janar.
