Instituti Hidrometeorologjik i Kosovës ka njoftuar se si pasojë e reshjeve të pandërprera të shiut gjatë ditëve të fundit, në disa zona të vendit janë shkaktuar vërshime lokale.
Sipas njoftimit, vërshimet janë evidentuar kryesisht në pjesën perëndimore të Kosovës, përfshirë Gjakovën, Junikun, Deçanin, Malishevën dhe Klinën, si dhe në disa zona të pjesës qendrore të vendit.
Si rezultat i reshjeve, disa lumenj dhe përrenj kanë dalë nga shtretërit e tyre.
Instituti bën të ditur se reshjet e shiut, me intervale dhe intensitet të ndryshëm, pritet të vazhdojnë edhe gjatë ditëve në vijim, çka mund të shkaktojë vërshime të tjera lokale, probleme në komunikacion, vështirësi në sistemet e kanalizimit dhe pengesa në trafik.
Aktualisht, sipas IHMK-së, lumenjtë kryesorë të vendit, veçanërisht në pjesën qendrore, lindore dhe jugore, përfshirë Ibrin, Sitnicën, Lepencin dhe Moravën e Binçës, po shënojnë ngritje të lehta të nivelit të ujit.
