Klinaku, në një konferencë për media, theksoi se me kryeministrin Kurti nuk janë dakorduar, teksa kanë kërkuar që të kthehet pika e cila e përcakton që paga e veteranit të luftës nuk mund të jetë më pak se paga minimale, shkruan teve1.info
“I kemi diskutu shumë çështje, por kërkesa jonë kryesore ka qenë kjo që edhe i kemi zhvilluar edhe do të vazhdojmë t’i zhvillojmë protestat e veteranëve, invalidëve, familjeve të dëshmorëve. Me kryeministrin nuk u dakorduam, sepse ne kërkuam të kthehet pika 3.1., që ka ndryshuar kjo Qeveri në Kuvendin e Kosovës ,që me atë pikë 3.1. e kanë larguar beneficionin e veteranit të luftës që është me ligj, që nuk mund të jetë më pak se paga minimale”, tha ai.
Klinaku potencoi se protestat do i vazhdojnë derisa kjo çështje të rregullohet.
“Ne i thamë që kërkojmë që pika 3.1. të kthehet dhe në seancat që do të mbahen, ne vazhdojmë protestat tona derisa kjo çështje të rregullohet”, tha Klinaku.
Dje, që nga mëngjesi e deri në orët e pasdites, veteranët e OVL-UÇK-së kanë protestuar para oborrit të Kuvendit për shkak të mospërfshirjes së tyre në Projektligjin për pagën minimale. Protesta ka kaluar pa incidente. /Teve1.info/
