Edhe në zgjedhjet e parakohshme të 28-dhjetorit, Lista Serbe doli partia më e dënuar nga PZAP-ja për shkelje të rregullave gjatë fushatës elektorale.
Për një ankesë të Lëvizjes Vetëvendosje, për vendosjen e banerëve në një ndërtesë kolektivi, PZAP-ja e kishte dënuar Listën Serbe me dy mijë euro.
Mirëpo dënimet për këtë parti nuk përfunduan me kaq.
Partia më e madhe serbe u dënua edhe me 45 mijë euro, pasi subjekti politik Kosovski Savez u ankua në PZAP, duke treguar se aktivistë të partisë së saj i panë anëtarë të Listës Serbe, duke vendosur materiale promovuese në Leposaviq, Zubin Potok dhe Graçanicë.
Përveç këtyre shkeljeve, Lista Serbe u promovua edhe nga Presidenti i Serbisë, Aleksandar Vuçiq, përmes mediumit që mbanë nën kontroll, “Pink”.
Këto ndërhyrje të Serbisë në zgjedhjet në Kosovë, politologu Dorajet Imeri i vlerëson në tri forma.
“Serbia ka ndërhyrë në zgjedhjet në Kosovë në disa forma. Forma e parë është forma e kërcënimit, me ç’rast ka rezultuar me dy kandidatët e subjektit politik të Nenad Rashiq nga gara për deputet, që nënkupton se ata duke ndikuar kësisoj e kanë pamundësuar garën demokratike brenda subjekteve politike serbe në Kosovë. Forma e dytë ka qenë përmes shantazhit dhe kërcënimit me ç’rast kanë frikësuar pjesëmarrjen e serbëve në Kosovë, nëse eventualisht të njëjtit nuk do ta votonin Listën Serbe. Forma e tretë, është forma e joshjes dhe, manipulimit për çka në këtë mënyrë kanë mbështetur njerëz të rasteve sociale duke i joshur me të mira materiale”, tha ai.
Sipas tij, Lista Serbe është subjekti politik më i dënuar në këto zgjedhje.
“Këto forma nuk janë bërë ndryshe përvec në koordinim të plotë në mes të Vuciq, Radoijiciq por edhe atë të ashtuquajturës Zyrës për Kosovë të cilën e përmendët ju. Kjo ka rezultuar me dënime të ashpra sidomos gjuha e përdorur në fushatë, nga ky subjekt politik, Komisioni Qendror i Zgjedhjeve, që ka përcaktuar një shkallë të lartë të dënimeve që është më e larta në këto zgjedhje”.
Pak ditë para mbajtjes së zgjedhjeve të parakohshme, Zura e ashtuquajtur për Kosovë në Serbi, hapi 300 vende të reja të punës për serbët në Kosovë. E gjithashtu, liderë të Listës Serbe, shkuan në takim në Rashkë me drejtorin kësaj zyre, Petar Petkoviq.
