Kosovarët po presin me shpresë të madhe se do të kenë një përgjigje pozitive për vizat.
Kur na ndajnë pak ditë nga ky Samit, këtë të enjte situata nuk ka qenë e qetë në Kosovë.
Në rajonin e Gjilanit dhe në Mitrovicën e Veriut, u dhanë alarme për bomba, e që më vonë policia konfirmoi se ishin të rreme.
E kjo nuk është hera e parë që Kosova trazohet kur është në pritje të marrë dritën e gjelbër për vizat.
Profesori në Universitetin Agder, Abit Hoxha, thotë se ka interesa nga faktorë të ndryshëm, që Kosova të destabilizohet në këto momente.
Por, Hoxha beson që këtë vit vizat do të liberalizohen për kosovarët.
Nga një perspektivë tjetër këtë proces e sheh diplomati britanik, Timothy Less.
Less, thotë se këto ngjarje nuk do ndikojnë në vendimin e Këshillit të Bashkimit Evropian për Kosovën, megjithatë shprehet skeptik se kosovarët do të marrin një përgjigje pozitive.
“Pikëpamja e Këshillit Evropian për liberalizimin e vizave nuk do të ndryshojë nga këto ngjarje, pavarësisht se ka tentativa që Kosova të paraqitet si politikisht e paqëndrueshme. Shtetet e bllokut evropian, kanë qëndrime të ndryshme sa i përket këtij procesi. Shtete si Franca, Danimarka dhe Holanda, kanë perceptimet e tyre pavarësisht përkrahjes së hapur nga Gjermania. Nuk e shoh se liberalizimi i vizave të ndodhë, së paku jo në këto momente”, tha Less.
Gjatë ditës së sotme edhe shteti skeptik Franca, ka konfirmuar se do të diskutohet rreth çështjes së liberalizimit të vizave për Kosovën.
Raporti i gazetarit Shpat Blakçori.
