Kryetari i Prishtinës, Përparim Rama, ka ftuar qytetarët që përmes votës së tyre të kontribuojnë në avancimin e proceseve demokratike në vend.
Pas votimit, Rama është shprehur se zgjedhjet përfaqësojnë një ditë të rëndësishme për Kosovën, duke theksuar se ato dëshmojnë pjekurinë demokratike të shoqërisë.
Ai ka uruar që rezultati i zgjedhjeve të sjellë një Qeveri që beson në bashkëpunim të ngushtë me Kryeqytetin, pasi sipas tij, Prishtina paraqet një mundësi reale për zhvillimin dhe avancimin e vendit.
“Sot është një ditë e mirë për Kosovën. Një ditë që dëshmon se jemi një shoqëri demokratike. Uroj që zgjedhjet të sjellin një Qeveri që beson në bashkëpunim me Kryeqytetin, sepse përmes Prishtinës kemi mundësi reale për ta avancuar vendin.I ftoj qytetarët të kontribuojnë në ecjen përpara të proceseve demokratike”, ka thënë ai.
Rama ka theksuar gjithashtu se Kosova ka nevojë për një Qeveri stabile për katër vitet e ardhshme, e cila do të ketë vizion të qartë, mision të përbashkët dhe bashkëpunim të vazhdueshëm me partnerët ndërkombëtarë.
“Me vizion të qartë, mision të përbashkët dhe bashkëpunim me partnerët tanë ndërkombëtarë, Kosova ka nevojë për një Qeveri stabile për katër vitet e ardhshme”, ka përfunduar Rama./teve1.info/
