Sokol Cikalleshi ka “zbarkuar” në Vlorë dhe ka ndezur menjëherë spekulimet për një transferim të bujshëm te Flamurtari. “Panorama Sport” zbulon ekskluzivisht se ish-lojtari i Kombëtares shqiptare ka zhvilluar një takim maratonë, që ka zgjatur rreth tre orë, me presidentin Sinan Idrizi.
Burime pranë klubit bëjnë me dije se mes Cikalleshit dhe Idrizit është diskutuar për një bashkëpunim të mundshëm që në merkaton e janarit. Presidenti i Flamurtarit i ka bërë të qartë sulmuesit se është i gatshëm t’i plotësojë çdo kusht financiar, vetëm për ta pasur pjesë të skuadrës në këtë moment delikat.
35-vjeçari nga Kavaja ka një karrierë të pasur me fanellën kuqezi, ku numëron 60 ndeshje dhe 13 gola të shënuar me Kombëtaren shqiptare.
Sulmuesi ka luajtur së fundmi në Turqi me Adanaspor, ndërsa nga janari i këtij viti, aktualisht është lojtar i lirë.
Cikalleshi nuk është i vetmi “big” në radarët e Flamurtarit. Vlonjatët kanë hedhur sytë edhe nga Armando Sadiku, një tjetër ish-sulmues i Kombëtares shqiptare dhe një nga golashënuesit më të spikatur të viteve të fundit.
34- vjeçari ka një karrierë të pasur, duke luajtur me klube të njohura sidomos në Zvicër dhe Spanjë. Aktualisht, Sadiku është pjesë e Belinzonës në Zvicër, derisa gazeta raporton se ndërmjet klubit e lojtarit pritet të ketë bisedime edhe gjatë muajit janar.
