Para pak ditësh, u njoftua se është në gjendje të rënduar shëndetësore.
Familjarët e Salih Mustafës thanë se atij i ishte refuzuar kërkesa nga Specialja që të lejohet ta vizitojë babanë në spital.
Të enjten, babai i Salih Mustafës, Jahja Mustafa, ndërroi jetë.
Lëvizje pozitive nga Gjykata Speciale për mundësimin e ardhjes në Kosovë, pritet të paktën të ketë me rastin vdekjes.
“Po besoj që më në fund do ta lejojë që së paku t’i vizitojë familjarët e tij dh eta vizitojë varrin e prindit të tij. Është e padrejtë mos me u leju që në momentet e fundit që ta vizitojë prindin e tij dhe t’i qëndrojë afër para vdekjes”, ka thënë Qeriqi.
Nga Specialja gjatë së enjtes nuk kanë treguar nëse kjo do t’i mundësohet Salih Mustafës.
Derisa, vazhdon të kritikohet Specialja, që nuk ia dha mundësinë Calit që ta sheh për herë të fundit gjallë të atin.
“E kemi pa edhe në vendimin e dënimit të Calit që ka qenë një vendim politik, i pabazë, i paarsyeshëm por ka qenë i qëllimshëm. Edhe veprimet e fundit, do të thotë në moslejimin për vizitë të familjarit, në këtë rast të prindit të Calit, shihet se është një tendencë, një vendim johuman.”, u shpreh tutje Qeriqi.
Ngushëllime për vdekjen e Jahja Mustafës, erdhën edhe nga Haga, nga ish krerët e UÇK-së që po mbahen në paraburgim.
“Sapo kemi pranuar një telefonatë nga Haga, nga bashkëluftëtarët tanë që po mbahen atje, të cilët na kërkuan që përmes nesh, si OVL UÇK, t’i përcjellim ngushëllimet e tyre për familjen Mustafa. Në emër të Hashim Thaçit, Kadri Veselit, Rexhep Selimit, Jakup Krasniqit, Salih Mustafës, Pjetër Shalës, Fadil Fazliut dhe Bashkim Smakajt, si dhe në emër të Organizatës së Veteranëve të Luftës së UÇK-së,i shprehim ngushëllimet tona më të sinqerta familjes Mustafa, për humbjen e më të dashurit të tyre”, thuhet në njoftimin e OVL-UÇK-së.
Në tri raste të ngjajshme, kur Kadri Veselit iu vdiqën të dy prindërit dhe Hashim Thaçit babai, ata nuk u lejuan të vijnë në ceremoninë mortore e as në të pame. Por, u lejuan të vijnë pas përfundimit të këtyre ceremonive, në një vizitë tek varri i tyre dhe u lejuan të vizitojnë familjarët e ngushtë.
