Trajneri Afrim Tovërlani e ka shënuar fitoren e parë në elitën e futbollit kosovar pas kthimit te Prishtina.
Prishtina që ishte pa fitore në elitën e futbollit kosovar prej 25 tetorit kur e mposhti Dukagjinin 2:0, të shtunën në “Fadil Vokrri” në Prishtinë e mposhti Drenicën 2:1.
Fitorja me rikthim të rezultatit i takoi xhiros së 18-të. Kjo është edhe xhiroja e fundit e stinorit pranveror dhe e fundit për këtë vit. Prishtina do ta luajë edhe një ndeshje të mbetur, atë ndaj Dritës.
Ronaldo Chacon e shënoi golin e vetëm për Drenicën. Sulmuesi 27-vjeçar nga Venezuela realizoi në minutën e 31-të, pas penalltisë që e fitoi Igball Jashari.
Përmbysja e rezultatit u bë në pjesën e dytë.
Për 1:1 supergol realizoi mbrojtësi i krahut të djathtë, Ramiz Bytyqi. Bytyqi në minutën e 57-të shënoi me të majtën nga zona, pas gjuajtjes së saktë e të fuqishme.
Më pas, Mario Ilievski në minutën e 78-të ia siguroi pikët e plota skuadrës “bardhekaltër”. Për Ilievskin ishte goli i shtatë sezonal.
Prishtina me fitore ngjitet në pozitën e dytë me 30 pikë, dy më pak se Ballkani lider, dhe dy më shumë se Dukagjini. Të dyja do të luajnë të dielën mes vete në stadiumin “18 Qershori” në Klinë.
