Kandidati i Lidhjes Demokratike të Kosovës për kryeministër, Lumir Abdixhiku, ka deklaruar se fushata për zgjedhjet e 28 dhjetorit duhet të fokusohet në programet zgjedhore dhe jo në tema që sjellin ndarje dhe përçarje.
Përmes një videoje të publikuar në Facebook, Abdixhiku ka bërë të ditur se aktivistët dhe vullnetarët e LDK-së do të angazhohen në shpërndarjen e programit zgjedhor të partisë, i cili përmban zotimet për zhvillimin e Kosovës. Ai ka vlerësuar se ky dokument përfaqëson ofertën më të mirë politike aktualisht në vend.
Në kuadër të programit, Abdixhiku ka premtuar rritje të pagave për të gjithë të punësuarit në sektorin publik, si dhe politika që synojnë punësimin e të rinjve dhe përkrahjen e pensionistëve.
Po ashtu, ai ka përmendur ndërtimin e një centrali të ri me gaz, një stadiumi të ri dhe një spitali modern.
Kryetari i LDK-së ka theksuar se, në rast se bëhet kryeministër, vendi do të hyjë në një fazë të re të zhvillimit me projekte të mëdha infrastrukturore. Në këtë kuadër, ai ka përmendur ndërtimin e unazës së kryeqytetit, autostradën e Gjilanit, si dhe rrugët që lidhin Pejën, Podujevën, Mitrovicën dhe Gjakovën.
“Të flasim për programe, sa ma pak për fjalë, ndarje, e përçarje. Zgjidheni shpresën”, ka thënë ai./teve1.info/
