Sot në seancën e Kuvendit të Shqipërisë, deputetët e opozitës u futën në sallë dhe u ulën në karriget e ministrave të qeverisë duke u përplasur edhe fizikisht me punonjësit e Gardës të cilët u përpoqën t’i largonin prej aty.
Për shkak të kaosit të krijuar, me kërkesë të kreut të grupit të PS, Taulant Balla, Kuvendi kaloi në votim rendin e ditës.
Deputetët e PD-së ndezën flakadanë sapo kryetari i Kuvendit Niko Peleshi rinisi seancën pas disa minutave pushim.
Gjatë seancës kryetari i Kuvendit, Niko Peleshi përjashtoi deputetët demokratë Klevis Balliu dhe Flamur Noka, të cilët me gjithë vendimin vijuan të qëndrojnë në sallë.
Për këtë, gazetari nga Shqipëria Bekim Bici ka treguar për emisionin “Ditari” se si filloj përleshja dhe kaosi mes deputetëve të Partisë Demokratike dhe atyre të mazhorancës.
“Në fakt ishte një seancë e cila pritej të ishte e tensionuar në Shqipëri, kjo referuar të gjitha zhvillimeve që kanë ndodhur në ditët e fundit në vendin tonë, kësisoj ishte e parashikuar nga të dyja palët nga ana e mazhorancës socialiste dhe nga demokratët, nga opozita e drejtuar nga Partia Demokratike që mund të kishte tensione, referuar kësaj partia socialiste kishte vendosur të bënte një mbledhje të grupit parlamentar të saj në orën 9 e 30 pra vetëm 30 minuta para se të fillonte seanca parlamentare, ndërkohë të informuar mbi këtë zhvillim edhe Partia Demokratike zgjodhi që të vinte e gjitha në formë grupi brenda sallës plenare dhe të tentonte të bllokonte jo vetëm foltoren e ish-kryeministrit, njëherësh tashmë krye demokrati Sali Berisha”, ka deklaruar Bici në emisionin “Ditari” në Tëvë1.
Tutje, Bici tha se kjo që ndodhi në Kuvendin e Shqipërisë, ishte e pritshme dhe siç u shpreh ai, ishte një marrëveshje paraprake mes të dyja palëve.
Derisa, ai përmendi se mazhoranca dhe Garda e Republikës kishte marrë të gjitha masat për të mos lejuar degradimin e situatës nga ana e deputetëve të opozitës.
“Ishte e pritshme kjo, dhe më dukej se ishte një marrëveshje paraprake mes dy palëve, pasi të dyja palët ishin të informuar për atë që do të ndodhte, Partia Demokratike ishte e informuar se mazhoranca dhe Garda e Republikës kishte marrë të gjitha masat për të mos lejuar degradim apo avancimin e situatës nga ana e deputetëve të opozitës”, u shpreh gazetari./teve1.info/
