“Gjatë bisedimeve intensive me partnerët tanë u mor vendimi që të gjitha masat t’i hiqen Kosovës, ku një pjesë e madhe i hiqet sot, kurse pjesa tjetër në fund të janarit. Rrjedhimisht, edhe fondet do të zhbllokohen, një pjesë shumë e madhe menjëherë e një pjesë tjetër në fund të janarit”
Nga Brukseli e dha lajmin për qytetarët e Kosovës.
E para e shtetit, Vjosa Osmani, tregoi se një pjesë e masave veçse do të hiqen në dhjetor, kurse pjesa tjetër largohen gradualisht nga janari.
Këtë lajm e mirëpriti edhe kryeministri në detyrë, Albin Kurti.
“Ne e mirëpresim vendimin e BE-së për të hequr masat e vendosura ndaj Kosovës. Qeveria jonë ka pohuar vazhdimisht se këto masa ishin të padrejta që nga fillimi, pasi ato sanksionuan Kosovën për përçarjet e orkestruara nga Serbia – një axhendë që çoi gjithashtu në sulme të shumta të mëdha terroriste në territorin tonë, duke përfshirë sulmin fatal në Banjska dhe një tjetër në Ibër-Lepenc që synonte infrastrukturën kritike. Gjatë gjithë kësaj periudhe, ne kemi mbetur plotësisht të përkushtuar ndaj Bashkimit Evropian, për përmbushjen e kritereve për anëtarësim dhe për të vazhduar si aleatë të përkushtuar dhe kampionë të vlerave demokratike”, u shpreh Kurti.
Por se për çfarë vlere dhe për çfarë projekte saktësisht bëhet fjalë, tregon drejtoresha ekzekutive e GLPS-së, Njomza Arifi.
“Bëhet fjalë për katër projekte në total me një shumë prej 34.6 milionë eurosh. Janë projekte që lidhen kryesisht me infrastrukturë, me çështjen e sistemit të ngrohjes në Prishtinë apo me skenën e të rinjëve Young Sell dhe disa projekte të tjera të cilat siç duket dhe sipas burimeve janë projekte të cilat kanë rrezikuar t’i kalohet afati për përfitim të fondeve dhe janë konsideruar si projekte që janë në listën prioritare që do të duhej të liroheshin fondet që kanë qenë subjekt i bllokimit për shkak të masave”, tha ajo.
Arifi thekson se duhet të punohet në fondet e IPA-s, që janë projekte para anëtarësimit të Kosovës në Bashkimin Evropian.
“Ky 34.6 milionë euro lirohet tani kurse dëgjuam edhe presidenten Ursula Von Der Leyen e cila deklaroi se Kosova duhet tash të programoj dhe të propozoj projektet për programin IPA 2026/27 për lirim e rreth 205 milionë eurove të tjera në fillim të vitit të ardhshëm sepse këto fonde propozohen nga Kosova por duhet të miratohen nga Komisioni Evropian dhe të mbështeten nga vendet anëtare”, u shpreh ajo.
Masat ndëshkuese të Bashkimit Evropian ndaj Kosovës u vendosën para dy viteve, në qershor të vitit 2023.
Kjo i ka kushtuar vendit me humbje të milionave eurosh, për shkak të projekteve të pezulluara ose të shtyra për afat të pacaktuar.
