Lidhja Demokratike e Kosovës (LDK) ka akuzuar partinë në pushtet, Lëvizjen Vetëvendosje për nepotizëm dhe kapje të shtetit.
Një ditë pasi u raportua në media për formën e emërimit të Faruk Mujkës si kryeshef në ndërmarrjen publike “Ibër-Lepenc”, zyrtarë të LDK-së thanë se përmes grupeve joformale po vendoset për interesin publik.
Anëtari i Kryesisë së LDK-së, Besian Mustafa, në një konferencë për media të enjten, tha se “LVV-ja dhe qeveria në detyrë janë të zhytura kokë e këmbë në pazare të punësimit”.
“Vetëvendosje erdhi në pushtet me premtimin se do të punojnë me duar të pastra, por shumë shpejt u kuptua dhe u shpalos se janë të zhytur kokë e këmbë në pazare të punësimit. Kjo nuk është qeveri. Është qeveri thjesht e ‘WhatsApp-it’. Mesazhi i LVV-së për një të ri apo të re është i qartë dhe i ftohtë, madje brutal. Nëse je militant i Dejona-s e ke derën e hapur, nëse je student i dalluar apo profesionist i ndershëm e ke derën e mbyllur. Për LVV-në shteti është një pronë private, ndërsa zyrat e shtetit janë degë dhe nëndegë të partisë”, tha ai.
Në anën tjetër, anëtari tjetër i Kryesisë së LDK-së, Berat Rukiqi, tha se LVV-ja përmes grupeve joformale po krijon një shtet paralel që ka pasoja për qeverisjen demokratike.
“Kosova po përballet me aferën më të rëndë të kapjes së shtetit, të njohur tani si afera ‘WhatsApp’, apo afera e marrjes së vendimeve për interes publik në grupe private në platforma të komunikimit privat. Përmes këtyre grupeve joformale është krijuar një shtet paralel dhe kjo ka krijuar pasoja për qeverisjen demokratike në vend, duke u shndërruar në qeverisje totalisht të kapjes së shtetit dhe jo të demokracisë funksionale. Shefi formal politik i kësaj forme është Albin Kurti”, shtoi Rukiqi.
Mustafa dhe Rukiqi kërkuan nga sistemi i drejtësisë të ketë hetim penal ndaj, siç thanë, kësaj afere publike.
