Partia Socialiste ka kërkuar marrjen e masave disiplinore për 29 deputetë të opozitës, pas kaosit të krijuar në seancën e sotme plenare.
Në një deklaratë për media, zëdhënësja e Partisë Socialiste Erjona Ismaili, ka bërë me dije se deputetët socialistë kanë kërkuar përjashtimin me 60 ditë nga punimet në komisione parlamentare dhe seanca plenare të deputetëve Belind Këlliçi, Fidel Kreka, Albana Vokshi, Ledina Alolli, Denisa Vata, Klevis Balliu, dhe Flamur Noka.
Sipas zëdhënëses së PS, deputetët Balliu, Noka, Hoti dhe Kreka kanë hedhur sende të forta dhe mjete të tjera drejt kryeparlamentarit Niko Peleshi dhe ministrave të qeverisë, duke i penguar këta ytë fundit që të merrnin fjalën në Kuvend, si dhe kanë cënuar seriozisht rendin e seancës plenare.
PS ka kërkuar gjithashtu përjashtimin me 30 ditë nga pjesëmarrja në komisione dhe seancë plenare të deputetes Elda Hoti, Gazment Bardhi dhe Sali Berisha,pasi sipas tyre, kanë penguar jo vetëm zhvillimin e rregullt të seancës, por kanë fyer anëtarët e Këshillit të Ministrave, duke shkelur kështu Kodin e sjelljes së deputetit.
Për 19 deputetët e tjerë, konkretisht Besart Xhaferri, Xhelal Mziu, Bledjon Nallbati, Luçiano Boçi, Saimir Korreshi, Edi Paloka, Ina Zhupа, Klodiana Çapja, Oerd Bylykbashi, Enno Bozdo, Tomorr Alizoti, Ivi Kaso, Gent Strazimiri, Luan Baçi, Bledi Himçi, Greta Bardeli, Manjola Luku, Flamur Hoxha dhe Kliti Hoti, PS ka kërkuar përjashtimin me 10 ditë nga punimet e Kuvendit, pasi sipas socialistëve, jo vetëm kanë penguar punimet e seancës plenare, por gjithashtu kanë dhunuar punonjës të Gardës.
PS argumenton se bazuar në pamjet filmike, deputetët Belind Këlliçi, Fidel Kreka, Albana Vokshi, Ledina Alolli dhe Denisa Vata kanë futur dhe përdorur në seancë lëndë apo mjete piroteknike.
Për deputetët Klevis Balliu dhe Flamur Noka, të cilët u përjashtuan nga seanca e sotme plenare nga kryeparlamentari Peleshi, PS thekson se kanë goditur punonjësit e Gardës së Republikës, “veprime për të cilat i takon Prokurorisë të vendosë nëse janë goditje për shkak të detyrës, për fillimin e ndjekjes penale ndaj personave të dyshuar”.
