Kryeministri izraelit, Benjamin Netanyahu tha të mërkurën se ka miratuar një marrëveshje eksporti gazi natyror prej 35 miliardë dollarësh në Egjipt, marrëveshja më e madhe e gazit në historinë e Izraelit, raporton Associated Press.
Gazi do të furnizohet në Egjipt gjatë 15 viteve të ardhshme nga gjigandi amerikan i energjisë Chevron , një pronar kryesor i fushës së gazit pranë brigjeve të Izraelit në Detin Mesdhe. Gjysma e të ardhurave pritet të shkojë në arkën shtetërore të Izraelit.
Në një deklaratë të regjistruar në video, Netanyahu tha se marrëveshja “e forcon shumë pozicionin e Izraelit si një fuqi rajonale energjetike dhe kontribuon në stabilitetin në rajonin tonë”.
Egjipti, i cili kufizohet si me Izraelin ashtu edhe me Gazën, nuk e konfirmoi menjëherë njoftimin e Netanyahut.
Ministri izraelit i Energjisë, Eli Cohen, një aleat i ngushtë i Netanyahut, më parë e kishte penguar marrëveshjen me Egjiptin , duke pretenduar se kushtet nuk ishin të favorshme për Izraelin. Vonesat e tij e shtynë Sekretarin amerikan të Energjisë, Chris Wright, të anulonte një udhëtim në Izrael në tetor.
Izraeli zbuloi fusha të konsiderueshme gazi natyror pranë bregdetit të tij mesdhetar në fillim të viteve 2000 dhe filloi të eksportonte gaz – së pari në Jordani dhe më vonë në Egjipt – gati një dekadë më parë.
