Ushtria izraelite thotë se ushtarët e saj qëlluan për vdekje një djalë adoleshent palestinez dje në Bregun Perëndimor të pushtuar, pasi ai qëlloi me gurë drejt tyre.
Ushtria pretendoi në një deklaratë të shkurtër të cituar nga The Times of Israel se një “trazirë” shpërtheu në zonën pranë Betlehemit dhe se u hodhën gurë drejt forcave izraelite.
“Trupat përdorën mjete për shpërndarjen e trazirave dhe më pas hapën zjarr ndaj njërit prej nxitësve kryesorë”, tha ushtria, duke shtuar se “u identifikua një goditje”.
Ndërkohë, të martën Kryetari i bashkisë së qytetit Tuqu, Muhammad al-Badan, i ka thënë agjencisë së lajmeve Wafa se kolonët izraelitë kanë qëlluar për vdekje një tjetër djalë 16-vjeçar.
Incidenti ndodhi kur turma të mëdha njerëzish u mblodhën në Betlehem këtë mëngjes për t’i dhënë lamtumirën 16-vjeçarit të vrarë dje nga ushtarët izraelitë për hedhje gurësh.
Kolonë të dhunshëm izraelitë të martën plagosën poashtu pesë anëtarë të një familjeje palestineze, përfshirë fëmijë, në një sulm gjatë natës në zonën al-Auja pranë qytetit të Jerikos në Bregun Perëndimor të pushtuar.
Shoqata Palestineze e Gjysmëhënës së Kuqe tha se mjekët e saj trajtuan prindërit dhe tre vajzat e tyre në vendngjarje përpara se t’i transportonin në spital, pasi u sulmuan nga kolonët izraelitë që sulmuan zonën ndërsa ushtarët izraelitë po bastisnin qendrën e qytetit në agim.
