Pas sulmit në plazhin Bondi në Sydney të Australisë, ku mbetën të vrarë 16 persona, përfshirë dhe njërin nga sulmuesit, emri i një personi ka qenë në vëmendje për aktin heroik të ndalimit të sulmuesit dhe çarmatosjes së tij.
Ahmed al-Ahmed, 43 vjeçar me origjinë siriane, baba i dy fëmijëve, tani gjendet në një gjendje kritike në spitalin St George në Sydney, pasi u plagos rëndë derisa po mundohej të çarmatoste sulmuesin.
Ai fitoi famë ndërkombëtare pas shpërndarjes së videos në rrjetet sociale ku Ahmad shihet duke u nxituar drejt njërit prej autorëve të sulmit, duke kërcyer mbi të dhe duke ia marrë armën nga duart.
Ai u cilësua si hero nga kryeministri australian, kryeministri i Uellsit të Ri Jugor dhe presidenti i SHBA-së.
Kryeministri i Uellsit të Ri Jugor , Chris Minns, vizitoi al-Ahmedin në spital dhe postoi në Instagram duke lavdëruar “heroin e jetës reale”, shkruan Guardian.
“Mbrëmë, trimëria e tij e jashtëzakonshme pa dyshim shpëtoi jetë të panumërta kur çarmatosi një terrorist me një rrezik të madh personal”, shkroi Minns. “Nuk ka dyshim se do të ishin humbur më shumë jetë nëse nuk do të ishte për guximin e paepur të [al-Ahmedit].”
Jozay, një kushëri i Al-Ahmed, tha se ai po shërohej nga operacioni i tij i parë dhe i duhej të bënte edhe dy të tjera. “Ai mori shumë ilaçe, nuk mund të flasë mirë”, tha Jozay pasi doli nga spitali të hënën në mbrëmje.
Një kushëri tjetër, Mustafa al-Asaad, i tha rrjetit televiziv Al Araby se al-Ahmedi ndërhyri si një “akt humanitar”.
Pasi kaloi një orë me të të hënën në mëngjes, ai tha se kushëriri i tij i tha: “Zoti më dha guxim” dhe se nuk pendohej për veprimet e tij.
Sipas prindërve të tij, al-Ahmedi po pinte kafe me një mik në Bondi kur dëgjoi të shtënat. Ata thanë se ai do të kishte bërë gjithçka për të mbrojtur këdo.
“Kur bënte atë që bënte, nuk mendonte për prejardhjen e njerëzve që po shpëtonte, njerëzit që vdisnin në rrugë”, tha babai i tij.
Lubaba Alhmidi AlKahil, drejtoresha e medias për Shoqatën Australianë për Sirinë, vizitoi al-Ahmedin të hënën pasdite për t’i çuar një tabaka me ushqim dhe një buqetë me lule.
“Mund të mos e besoni, por ndërsa po shikonim lajmet, shumë prej nesh kishin ndjesinë se ai dukej si sirian, ai dukej vërtet sirian”, tha ajo. “Pastaj zbuluam se ai është sirian”.
Ajo tha se al-Ahmedi vinte nga një “familje e mrekullueshme” që e rrethonte me kujdes dhe lutje.
