Të dielën e fundit, kosovarët do i drejtohen sërish kutive të votimit në zgjedhjet e jashtëzakonshme parlamentare.
Të gjithë partitë politike po shprehën të bindur që do arrijnë të dalin fitues nga procesi i 28 dhjetorit.
Por analisti nga Shqipëria, Ben Andoni nuk sheh ndonjë ndryshim të madh nga ai i zgjedhjeve të 9 shkurtit.
Andoni thotë se mundësitë janë që të rritet Partia Demokratike e Kosovës dhe të ketë një koalicion me partinë e parë, Vetëvendosjen.
“Nuk mendoj që do të ketë ndonjë arkitekturë ndryshe, përveç që mund të them që Vetëvendosje mund të ketë pak më shumë prioritet nga këto zgjedhje të paktën nga perspektiva që shoh unë. Kjo është sepse ka marrë një lloj reagimi nga mënyra se si ata u përfaqësuan në zgjedhjet lokale, vërtetë nuk doli më mirë se PDK-ja dhe LDK-ja por janë më të shtrirë në bazë, kanë një elektorat që është jashtëzakonisht besnik, jashtëzakonisht i vendosur. Dhe besoj përveç PDK-së nga ana tjetër që po ngrihet me zotërinë Hamza që e njeh shumë mirë arkitekrutën e shtetit, nuk besoj për rezultate të mira të LDK-ja dhe partive të tjera. Prandaj duke parë që zotëri Hamza ka hequr vijat e kuqe do të jetë më e thjeshtë për tu krijuar Qeveria e re me këtë strukturë, Vetëvendosje –PDK” deklaroi ai.
Që partia e dytë do të jetë përcaktuese e thotë edhe Belgzim Kamberi nga Instituti “Musine Kokalari”.
Sipas Kamberit, gati është i pamundur themelimi i institucioneve pa bashkëpunime, pasi në prill është edhe votimi për Presidentin.
Nga zgjedhjet e 9 shkurtit, Lëvizja Vetëvendosje doli e para, Partia Demokratike e Kosovës e dyta, Lidhja Demokratike e Kosovës e treta dhe Aleanca për Ardhmërinë e Kosovës në koalicion me Nismën Socialdemokrate e katërta.
Asnjëra nga partitë politike nuk arritën koalicione me njëra tjetrën.
