Kryeministri në detyrë, Albin Kurti ka deklaruar se në të kaluarën në vend kishte shumë korrupsion dhe pak zhurmë rreth tij, pasi, sipas tij, ai nuk luftohej për shkak se “shteti ishte i kapur”.
Në adresimin e tij në Javën Kundër Korrupsionit, Kurti ka theksuar se tani, pas luftës dhe largimit të abuzuesve të homologimeve, asfaltimeve dhe terminaleve, duke kursyer qindra miliona, ka mbetur vetëm zhurma.
“Dikur kishim shumë korrupsion e më pak zhurmë për prezencën e tij. Ai nuk luftohej sepse shteti ishte i kapur. Sot kur ekonomia e buxheti i shtetit është shtuar me miliarda, kur janë luftuar e larguar abuzuesit e homologimeve, asfaltimeve e terminaleve, duke kursyer qindra miliona, ka ngelur, vetëm zhurma. E më të zhurmshmit janë ata që kanë humbur më së shumti”, ka thënë Kurti.
Ai ka shtuar se gjatë pesë viteve të qeverisjes së Lëvizjes Vetëvendosje janë arritur rezultate të prekshme në luftimin e krimit dhe korrupsionit.
“Gati pesë vite më parë, kur morëm mandatin qeverisës, korrupsioni nuk ishte perceptim, por realitet. Ishte një sistem i ngritur për t’i mbrojtur dhe pasuruar zyrtarët e korruptuar. Politikanët e korruptuar ju i larguat me votë, ndërsa ne e çmontuam sistemin që i mbronte ata. Gjatë qeverisjes sonë u shkatërruan 146 grupe kriminale, u arrestuan 350 zyrtarë publikë dhe u konfiskuan 6.7 ton drogë. U shkatërruan 23 laboratorë të drogës, përfshirë 13 në veri të vendit. Po ashtu, u mbyllën 10 objekte të laboratorëve ilegalë të kriptovalutave dhe u konfiskuan qindra pajisje”, ka theksuar ai.
Kryeministri në detyrë ka nënvizuar se rezultatet do të ishin edhe më të mira po të mos ishin bllokuar disa reforma kyçe nga Gjykata Kushtetuese.
“Rezultatet do t’i kishim edhe më të mira sikur të mos bllokohej reforma antikorrupsion nga Gjykata Kushtetuese, sidomos Byroja Shtetërore për Konfiskimin e Pasurisë së Pajustifikueshme”, ka deklaruar Kurti./teve1.info/
