Federata e Futbollit të Sllovakisë (SFZ) ka publikuar sot informatat për shitjen e biletave për ndeshjen e playoffit për Botëror, Sllovaka – Kosova. Federata ka marrë masa për të mos lejuar shitjen e biletave jashtë vendit, duke vendosur kushte të veçanta në procesin e shitjes dhe këtë e ka bërë të ditur në njoftimin e publikuar së fundi.
Kështu, duke shkruar se pritet një atmosferë elektrizuese në ndeshjen Sllovakia – Kosova që do të zhvillohet më 26 mars 2026 që nis prej orës 20.45 ka bërë të ditur se biletat do të shiten në dy faza. Ndeshja do të luhet në stadiumin kombëtar të Bratisllavës, “Tehelné pole”.
Faza e parë e shitjes së biletave do të fillojë nesër më 5 dhjetor 2025 prej orës 11.00. Aty, do të kenë të drejtë të blejnë bileta vetëm ata të cilët janë të anëtarësuar deri më 4 dhjetor në llogari të Federatës.
Ndërsa, faza e dytë e shitjes së biletave do të fillojë më 10 dhjetor 2025 prej orës 11.00, ku kjo do të jetë e hapur për gjithë publikun tjetër nga Sllovakia.
Biletat do të kenë këto çmime:
Kategoria 2 = 19 euro;
Kategoria 1 = 29 euro;
Prime = 49 euro;
VIP = 220 euro.
Kushtet e veçanta:
—Regjistrimi në faqen e Federatës për të krijuar llogari – është e obligueshme;
—Një anëtar mund të blejë maksimalisht 5 bileta;
—Para konfirmimit të pagesës, do të jetë e obligueshme konfirmimi i pagesës me SMS kod, që vjen vetëm në numër telefoni të operatorëve sllovak.
—Biletat do të shiten me emër, mbiemër, ditëlindje dhe adresë të banimit të secilit blerës.
—Do të kontrollohen ID-të e secilit person duke hyrë në stadium, pasi që ndeshja është vlerësuar si e rrezikut të lartë.
