Ministri në detyrë i Mjedisit, Planifikimit Hapësinor dhe Infrastrukturës, Hysen Durmishi, ka bërë të ditur se nga e hëna do të nisë mirëmbajtja dhe sanimi i gropave në të gjitha rrugët që janë në kompetencë të ministrisë që ai udhëheq.
Ai ka theksuar se institucionet tashmë janë të përgatitura edhe për sezonin e dimrit.
Durmishi njoftoi se këtë të enjte ka zhvilluar një takim me drejtorin e Departamentit për Menaxhimin e Rrugëve, Qamil Feka, si dhe me menaxherët e kontratave të mirëmbajtjes dhe punëkryesit.
Në takim ishin të pranishëm edhe zyrtarë të Policisë së Kosovës nga Departamenti për Menaxhimin e Trafikut Rrugor, përfshirë zyrtarin Jeton Rexhepi.
“Bashkëpunimi ndërinstitucional është kyç për më shumë siguri në rrugë dhe qarkullim më të lehtë,” theksoi ministri.
Ai shtoi se kujdesi i shtuar në komunikacion mbetet gjithmonë i nevojshëm.
