Prokuroria Themelore në Gjakovë ka njoftuar se ka paraqitur kërkesë në Gjykatën Themelore të Gjakovës për caktimin e masës së paraburgimit ndaj të pandehurit N.Sh., shtetas i Republikës së Shqipërisë.
Sipas njoftimit, ai dyshohet për kryerjen e veprës penale “Kultivimi i bimës së hashashit, shkurres së kokainës ose bimëve të kanabisit”.
Në kërkesën e Prokurorisë thuhet se ekziston dyshim i bazuar që N.Sh., në bashkëveprim me të pandehurin tjetër, O.Sh., ka kultivuar 1259 bimë kanabis sativa në tre parcela të ndryshme në fshatin Panorc, Komuna e Malishevës.
Veprat penale janë zbuluar përmes vëzhgimit me dron, që ka mundësuar identifikimin e parcelave të kultivimit.
Prokuroria ka theksuar se i pandehuri ka qenë në arrati që nga koha kur është dyshuar se ka kryer veprën penale.
Pas një operacioni ndërkombëtar, ai është arrestuar me urdhër arresti dhe më pas është ekstraduar nga Republika e Shqipërisë në Republikën e Kosovës.
