Ushtruesi i Detyrës së Ministrit të Drejtësisë, Blerim Sallahu, ka vizituar sot Qendrën për Punë Sociale në Mitrovicën e Veriut, si pjesë e fushatës globale “16 Ditët e Aktivizmit kundër Dhunës me Bazë Gjinore”.
Sallahu ka njoftuar për vizitën përmes një postimi në Facebook, ku tha se gjatë takimit me stafin u informua për punën, sfidat dhe sukseset e tyre të përditshme.
Ai vlerësoi atmosferën e bashkëpunimit ndërmjet stafit të përbërë nga anëtarë të komunitetit shqiptar, serb dhe komuniteteve të tjera, duke e cilësuar atë si shembull të profesionalizmit dhe përkushtimit në ofrimin e shërbimeve sociale.
“Në kuadër të fushatës “16 Ditët e Aktivizmit kundër Dhunës në Familje”, bashkë me kryetarin e komunës së Mitrovicës veriore, Erden Atiç, vizituam Qendrën për Punë Sociale që ndodhet atje. Gjatë takimit me stafin, u informuam për punën, sfidat dhe sukseset e tyre të përditshme. Aty gjetëm një atmosferë të shkëlqyer bashkëpunimi ndërmjet stafit nga komuniteti shqiptar, serb dhe komuniteteve të tjera, si shembull i mirë i profesionalizmit dhe përkushtimit”, ka shkruar Sallahu.
Ai ka theksuar se Ministria e Drejtësisë do të vazhdojë të ofrojë mbështetjen e plotë për fuqizimin e shërbimeve dhe rritjen e rezultateve për kategoritë në nevojë, duke e cilësuar rolin e punonjësve socialë si të rëndësishëm, profesional dhe fisnik.
“Për punën e tyre të rëndësishme, profesionale dhe fisnike, ofrova mbështetjen e plotë të Ministrisë së Drejtësisë, me qëllim që të forcojmë akoma më shumë shërbimet dhe rezultatet për kategoritë në nevojë”, ka përfunduar Sallahu./teve1.info/
