Eugen Cakolli nga Instituti i Kosovës për Drejtësi (IKD) ka vlerësuar si pikë të rëndësishme kthese për integritetin e zgjedhjeve vendimin e fundit të Panelit Zgjedhor për Ankesa dhe Parashtresa (PZAP), i cili përcaktoi se votimi i diasporës në zgjedhjet e 28 dhjetorit duhet të zhvillohet vetëm në përfaqësitë diplomatike të Republikës së Kosovës dhe jo në hapësira alternative.
Sipas Cakollit, vendimi rikthen një standard të qartë ligjor dhe, nëse rasti përfundon në Gjykatën Supreme, ai pret që edhe kjo instancë ta konfirmojë.
“Ky vendim mbyll çdo dilemë për mënyrën e organizimit të votimit jashtë Kosovës,” ka deklaruar ai.
Cakolli theksoi se PZAP-i ka ndalur përpjekjet për krijimin e një situate të rreme, sipas së cilës diaspora paraqitej si e penguar nga votimi.
Ai shtoi se as PZAP-ja, as parashtruesit e ankesës dhe as ndonjë institucion tjetër nuk e ka ndaluar të drejtën e diasporës për të votuar, por vetëm ka refuzuar shkeljen e ligjit “në emër të narrativave politike dhe kauzave elektorale”.
Ai kujtoi se edhe në zgjedhjet e rregullta të 9 shkurtit, kur afatet ishin më të gjata, shumica e qendrave të votimit jashtë vendit nuk arritën kapacitetin maksimal të regjistrimit të votuesve, duke nënvizuar se kërkesa reale nuk e ka tejkaluar kapacitetin ekzistues.
Cakolli kritikoi disa kërkesa të fundit për hapjen e qendrave shtesë të votimit në hapësira private, restorante apo ambiente fetare.
Sipas tij, këto iniciativa nuk burojnë nga nevoja praktike, por nga dëshira për të ushqyer narrativa elektorale.
Ai përmendi edhe paradoksin se vetë aktorët që këmbëngulën që zgjedhjet të mbahen më 28 dhjetor me arsyetimin se diaspora do të jetë në Kosovë, tashmë po kërkojnë qendra të reja jashtë vendit.
“Faktet janë të thjeshta dhe kokëforta,” u shpreh ai, duke theksuar se vendimi i PZAP-së dëshmon qartë se diaspora nuk është e penguar nga votimi, por do të votojë sipas procedurave të përcaktuara me ligj.
Sipas tij, kjo është mënyra më e sigurt për të garantuar vlefshmërinë dhe legjitimitetin e votës së çdo qytetari jashtë Kosovës.
