Kryetari i Lidhjes Demokratike të Kosovës (LDK), Lumir Abdixhiku, ka akuzuar Lëvizjen Vetëvendosje (VV) se po tenton të krijojë, siç e quan ai, “një sistem të manipulimit të votave”. Reagimi i tij vjen pas kritikave të Vetëvendosjes ndaj LDK-së në lidhje me formën e votimit të diasporës pas vendimit të PZAP-it.
Abdixhiku tha se qëndrimet e VV-së tregojnë panik, pasi sipas tij “mërgata nuk mashtrohet më”. Ai akuzoi Vetëvendosjen për tentativa të përsëritura për të ndryshuar format e votimit jashtë vendit në mënyrë që, siç thotë ai, të krijohen hapësira për manipulim.
“Mërgata nuk mashtrohet më. Mërgata nuk blihet. Mërgata po ndryshon. Mashtrimet e propagandat nuk kalojnë më! Jo më ndaj këtij vendi, jo më në emër të mërgatës, jo më ndaj demokracisë. Kosova po zgjohet, mërgata po rikthehet. E paniku i tyre është shenja e parë e humbjes që i pret,” ka shkruar Abdixhiku.
Kreu i LDK-së akuzoi Vetëvendosjen se po synon të ndërtojë një mekanizëm të kontrolluar të votimit jashtë procedurave ligjore.
“Sekt i Vetëvendosjes nuk e do këtë. Ata duan të manipulojnë. T’i printojnë vetë fletëvotimet, t’i mbushin vetë, t’i manipulojnë votat vetë. Të prodhojnë rezultatin që s’e marrin dot me besimin e qytetarëve,” deklaroi ai.
Në postimin e tij, Abdixhiku përmendi disa raste që sipas tij përbëjnë tentativa të Vetëvendosjes për të ndryshuar proceset zgjedhore të diasporës.
“Një herë provuan ta kthejnë sistemin e vjetër të votimit me email, ku një militant mbushte qindra fletëvotime para televizorit. Pastaj provuan votime në depo mallrash, salla dasmash e restorante, jashtë ambasadave e konsullatave, ku nuk ka kontroll e monitorim. PZAP nuk e lejoi,” ka shkruar ai.
Sipas Abdixhikut, mërgata këtë vit e ka më të lehtë se kurrë të votojë, pasi mund ta bëjë këtë në ambasada, konsullata apo edhe me postë.
“Secili bashkëatdhetar mund të votojë në emrin e vet, me fletëvotim të pranuar nga shteti i vet,” theksoi ai.
LDK, sipas tij, po punon çdo ditë me diasporën për t’i inkurajuar qytetarët që të regjistrohen dhe të votojnë.
Abdixhiku e përmbylli reagimin e tij duke theksuar se sipas tij, Vetëvendosja e ka kuptuar “një të vërtetë të madhe”:
“Mërgata nuk mashtrohet më. Mashtrimet e propagandat nuk kalojnë.”
