Ferizaj dhe Fer Volley janë fitues të Kupës së Pavarësisë në volejboll.
Morën pjesë skuadra nga Kosova, Shqipëria dhe skuadra shqiptare nga Maqedonia e Veriut.
Ndeshjet e Kupës së Pavarësisë u zhvilluan në palestrën “Bill Clinton” në Ferizaj.
Kampioni në fuqi i Kosovës në konkurrencën e meshkujve, Ferizaj, që në javën e kaluar humbi në finale të Kupës së Federatës nga Peja, iu revanshua skuadrës pejane duke e mposhtur 3:2 në sete. Më i miri i finales ishte Santiago Andres Ruiz Alvarez i Ferizajt.
Ferizaj në gjysmëfinale eliminoi Partizanin e Tiranës, 3:2, kurse Peja e eliminoi Shkëndijën e Tetovës, 3:0.
Te volejbollistet, Fer Volley në finale e mposhti Pogradecin me rezultatin 3:1 në sete.
Fer Volley, fitues i Kupës së Federatës të dielën e kaluar, në gjysmëfinale e mposhti Dinamon e Tiranës 3:0, ndërsa Pogradeci fitoi 3:0 ndaj Dritës.
Finalja ishte interesante, por skuadra e Fer Volleyt nuk lejoi befasi dhe fitoi 3:1 në sete. Më e mira e finales ishte Amela Llugaliu.
