Dhjetëra gjyqe për krime lufte, zhvillohen në departamentin special në Gjykatën Themelore në Prishtinë.
Kundër të akuzuarve dhe për krime të luftës, dëshmojnë para trupeve gjykuese dhjetëra dëshmitarë.
E për t’i dhënë epilog rasteve të krimeve të luftës, si thelbësore konsiderohen dëshmitë e dëshmitarëve.
“Kohëve të fundit kemi parë se kryesisht janë dënimet apo aktgjykimet dënuese, dhe sigurisht që trupi gjykues i ka vlerësuar besueshmërinë e këtyre deklaratave. Në ato raste ku deklaratat nuk kanë qenë bindëse apo arsyetimet e aktgjykimeve nuk kanë qenë bindëse, shkalla e dytë, nëse nuk gaboj këtë vit i ka kthyer dy raste në rigjykim”, thotë Amer Alija nga Fondi për të Drejtën Humanitare.
Përkundër gjitha vështirësive, përgjatë këtyre muajve janë zhvilluar edhe disa seanca në gjyqet që po zhvillohen në mungesë të të akuzuarve.
Kjo e mundësuar me ndryshimet ligjore, vlerësohet se ka rritur edhe efikasitetin e organeve të drejtësisë.
“Kjo është një rrethanë përjashtuese për shkak të pamundësisë, pavullnetit dhe mungesës së gatishmërisë së fqiut tonë veriorë për të vendosur drejtësi për këtë çështje kaq humane. Prandaj, Kodi i Procedurës Penale tashmë ka filluar së zbatuari dhe kemi një efikastitet edhe të Policisë por edhe të Prokurorisë, në hetimin dhe ndjekjen e këtyre veprave, pavarësisht faktit se ka kaluar kohë relativisht e gjatë. Mirëpo, duhet me pasë parasysh faktin se institucionet tona kanë filluar nga viti 2018 e këtej të merren ekskluzivisht me këto çështje”, është shprehur, Ardian Bajraktari, avokat
Së fundi, Shaqir Lutvija, i akuzuar për krime lufte u dënua me 10 vite burgim nga shkalla e parë.
