Kreu i Nismës Socialdemokrate, Fatmir Limaj, ka përkujtuar 20 vjetorin e aktgjykimit lirues të Gjykatës Ndërkombëtare të Hagës ndaj tij dhe dy bashkëluftëtarëve, duke theksuar se është trishtuese që edhe sot, pas dy dekadash, lufta e Ushtrisë Çlirimtare të Kosovës (UÇK) vazhdon të sfidohet në nivelet ndërkombëtare.
Në një postim në Facebook, Limaj ka rikujtuar se gjykimi ndaj tij, Isakut dhe Haredinit, ishte procesi i parë gjyqësor në Hagë kundër pjesëtarëve të UÇK-së dhe se përballja ishte e gjatë dhe sfidueshme, duke qenë se Kosova atëherë nuk ishte ende shtet dhe ata nuk kishin mbrojtje institucionale të organizuar.
“Sot bëhen 20 vjet nga aktgjykimi lirues i Gjykatës Ndërkombëtare të Hagës, e cila foli qartë: lufta e Ushtrisë Çlirimtare të Kosovës ishte e drejtë, e pastër dhe në mbrojtje të një populli që luftoi për të jetuar i lirë. Gjykimi ndaj meje dhe dy bashkëluftëtarëve të mi, Isakut dhe Haredinit, fatkeqësisht doli të jetë aktakuza e parë gjyqësore në Hagë kundër pjesëtarëve të UÇK-së. Ballafaqimi ynë gjyqësor në Hagë ishte i gjatë dhe sfidues. Në atë kohë Kosova nuk ishte shtet dhe ne ishim pa asnjë përkujdesje institucionale, pa mbrojtje të organizuar, ashtu siç do të duhej ta kishim në një proces të tillë gjyqësor. Edhe ne si individë, edhe e vërteta e luftës sonë çlirimtare, për herë të parë po sfidoheshin në nivelet e drejtësisë ndërkombëtare në Hagë. Në gjithë këtë proces e kishim të vërtetën e UÇK-së dhe mbështetjen e popullit”, ka shkruar ai në Facebook.
Më tej Limaj është shprehur i zhgënjyer që edhe sot, pas 20 viteve, lufta çlirimtare e UÇK-së po vazhdon të testohet dhe sfidohet po në Hagë.
“Është trishtuese që edhe sot, pas 20 viteve, lufta jonë çlirimtare vazhdon të testohet dhe sfidohet po në Hagë, në gjykimin e bashkëluftëtarëve tanë. Akuzat, shpifjet dhe fabrikimet kundër UÇK-së nuk kanë të ndalur. Jam i bindur që bashkëluftëtarët tanë së shpejti do të kthehen të lirë në Kosovë”, ka shtuar Limaj.
Ai gjithashtu ka kritikuar rolin e shtetit të Kosovës, duke theksuar se institucioneve u mungon përkujdesja e duhur për mbrojtjen e historisë dhe së vërtetës mbi të cilën është ndërtuar vendi.
“Po ashtu, është trishtuese kur sheh tani që Kosova, edhe pse është shtet, po bën fare pak në mbrojtje të historisë dhe së vërtetës së vet, mbi të cilën është ndërtuar ky shtet”, ka theksuar Limaj.
Limaj ka përmbyllur mesazhin me një nderim për luftën çlirimtare dhe dëshmorët e kombit:
“Përjetësisht krenar me luftën tonë çlirimtare; ajo nuk mund të njolloset; ajo është e pastër si loti. Rroftë UÇK-ja! Lavdi dëshmorëve të kombit!”
