Ministria e Punëve të Jashtme dhe Diasporës (MPJD) ka njoftuar se në orët e para të mëngjesit të sotëm, Nexhat Pireva, shtetas i Republikës së Kosovës nga Kamenica dhe ish-pjesëtar i Policisë së Kosovës për rreth 14 vite, është arrestuar nga autoritetet serbe në pikën kufitare të Dheut të Bardhë.
Sipas MPJD-së, Pireva po udhëtonte drejt Bujanocit së bashku me bashkëshorten dhe fëmijët e tyre.
“Pas marrjes në pyetje për rreth katër orë, Pireva është liruar dhe aktualisht ndodhet në liri”, thuhet në njoftim.
Ministria ka dënuar veprimet e autoriteteve serbe, duke i cilësuar si keqtrajtim ndaj shtetasve të Kosovës dhe si shkelje të marrëveshjeve ndërmjet dy shteteve.
MPJD u ka bërë thirrje qytetarëve të shmangin kalimin përmes territorit të Serbisë deri në informacione të mëtejshme, për të siguruar mbrojtjen e tyre.
