Venezuela u ka ndaluar gjashtë linjave ajrore të mëdha ndërkombëtare uljen në vend, pasi ato nuk arritën të përmbushnin një afat 48-orësh për të rifilluar fluturimet atje.
Linjat ajrore kishin pezulluar përkohësisht itineraret e tyre për në kryeqytet, Karakas, pasi SHBA-të paralajmëruan për “aktivitet të shtuar ushtarak” në zonë.
E zemëruar nga kjo, qeveria venezueliane u lëshoi transportuesve një ultimatum që skadoi të mërkurën. Ndërsa një numër linjash ajrore më të vogla vazhdojnë të fluturojnë për në Venezuelë, mijëra pasagjerë janë prekur, shkruan BBC.
SHBA-të kanë vendosur një forcë të madhe në ujërat pranë Venezuelës, të cilën e thonë se e ka për qëllim luftimin e trafikut të drogës, por të cilën udhëheqësi i Venezuelës e ka denoncuar si një përpjekje për ta rrëzuar atë.
SHBA-të kanë vendosur 15,000 trupa dhe aeroplanmbajtësen më të madhe në botë, USS Gerald Ford, në distancë goditjeje nga Venezuela.
SHBA-të thonë se qëllimi i vendosjes së trupave, më i madhi i ndërmarrë nga SHBA-të në rajon që nga pushtimi i Panamasë në vitin 1989, është luftimi i trafikut të drogës.
Forcat amerikane kanë kryer të paktën 21 sulme ndaj anijeve që thonë se transportonin drogë, duke vrarë më shumë se 80 persona.
